கள்ளக்காதல் களிப்பு தருமோ!

• கட்டிய மனைவியுடன்

இல்வாழ்வில் இணைந்து

வாழ்கிறான் பலமணிநேரம்

பாசம் காட்டுவதைக்

காட்டிலும்

வெறுப்பை உமிழ்ந்தபடி!

• கஷ்டத்தையும்,நஷ்டத்தையும்

சேர்ந்து

கணவனோடு தாங்குவதால்

அவளும் அவனிடத்தில்

கடுப்பைக் காட்டிக்கொண்டு!

• பகுதிநேர மனைவியைப்போல்

படுக்கையறை பகிர

தோளில் சாய்ந்து இளைப்பாற

கள்ளக்காதலி வைத்துக் கொண்டு

களிப்பை மட்டும்

அனுபவிக்கின்றான்

இன்னொருவளிடத்தில்!

• கட்டியவளைக் காட்டிலும்

கலையாய் தெரிகின்றாள்

கள்ளக்காதலி..

கஷ்டம் அனுபவிக்காமல்

வெறும் இஷ்டம் மட்டும்

அனுபவிப்பதால்!

பகுதிநேரமாய் வெறும்

மகிழ்ச்சியை

மட்டும் பகிர்வதால்!

• இவனிடத்தில் இன்முகம்

காட்டும் கள்ளக்காதலி

அவள் கணவனிடத்தில்

எரிந்து விழும் முகமாய்!

இருவருமே தன்

இல்வாழ்வில் காட்டும் அன்பை

எவரிடமோ காட்டி

குடும்பத்தை ஏமாற்றிக்கொண்டு!

• கள்ளக்காதலியிடம் காட்டும்

அன்பை

தன் மனைவியிடம்

காட்டிப் பார்த்தால்

அவளும் இன்முகம்தான்!

கள்ளகாதலனிடம் காட்டும்

பிரியம்

கணவனிடம் காட்டிப் பார்த்தால்

அவனும்

நல்லவன்தான்!

• இப்படித்தான் தன் கணவன்

மனைவியிடத்தில்

காட்ட வேண்டிய அன்பை

எங்கோ எவரிடமோ

காட்டிக் கொண்டு

களிப்பென்று எண்ணி

கானல்நீராய் வீணாய்ப் போகிறது

பலரது வாழ்க்கை!