என்னைக் கருணைக்கொலை செய்திடுங்கள்!

இருகால்கள் இருக்கின்றன

இருந்தும்

நானாய் நடக்க இயல்வதில்லை!

தடி பிடித்தும் இயலவில்லை

என் தாய்,தந்தையே

கைப்பிடியாய்!

என்னை நிமிர்த்தி வைக்க

முயற்சித்தும்

நான் கூனிக் குறுகி போகின்றேன்!

பெற்றோரை தாங்க

பிள்ளைஎன்பார்

என்னை தாங்கியபடி என் பெற்றோர்!

கூட்டுக்கிளியாய்

என் வாழ்க்கை

சிறகடிக்க முடியாமல்!

வயது முதிர்ந்தும்

குழந்தை குணத்தில்

நான் வாழ்வது ஏனோ புரியவில்லை!

ஆளாய் வளர்ந்து நிற்கின்றேன்

என் மூளை வளர

மறுக்கிறதே!

சிந்திக்க எனக்கு

இயன்றிருந்தால்

என்னை கருவில் நானே கலைத்திருப்பேன்!

என்னைக் கருணைக்கொலை

செய்திருக்கலாம்

என்மேல் கருணையில் பெற்றோர் செய்யலையே!