Posts tagged ‘கணினி’

ஒளிச்சிதறல் ஓவியம்(2003 )

டிஜிட்டல் ஓவியம் கற்றலின் ,ஆரம்ப முயற்சியாக 2003 ஆம் ஆண்டு நான் வரைந்தது.

நவம்பர் 15, 2010 at 10:09 முப 13 பின்னூட்டங்கள்

தொடர் பதிவு – கருப்பு,வெள்ளையில் கலர்புல் நினைவுகள்..

இது ஓர் தொடர் பதிவு..நமக்கு சிறுவயதில் நேர்ந்த அனுபவங்களின் பகிர்வு..

சிறுவயதில் நடந்த எத்தனையோ மறக்க முடியாத நினைவுகளை நம் மனதிற்குள் தேக்கி வைத்திருப்போம்..வாய்ப்பு கிடைக்கின்ற போது அதை எண்ணி நாம் தனியாகவோ,இல்லை நண்பர்கள்,உறவினர்களோடோ சிலாகிப்போம்..அசை போடுவோம்..ஆமோதித்து மகிழ்வோம்..அவ்வாறான ஒவ்வொருவருக்குள்ளும் ஊறிக் கிடக்கும் மறக்க இயலாத மலரும் சிறுவயது நினைவுகளை மற்றவர்களுடன் பகிர்ந்து கொள்ளவே இத்தொடர் பதிவு….ஆரம்பித்து வைக்கிறேன்..நண்பர்கள் அவரவர் அனுபவித்த அக்கால ஞாபகங்களை தொடருமாறு கேட்டுக் கொள்கிறேன்.

————————————————————————————————————————————————————————————————–

அது ஒரு கனாக்காலம்..சிறுவயது காலம்..படிக்க சொல்லி அப்பா,அம்மா,சித்தப்பா மற்றும் ஆசிரியர் மிரட்டலுக்கு பயப்படுவதைத் தவிர வேறொன்றிர்க் காகவும்,பயமறியாக்காலம்.

பாம்பைக்கண்டால் படை வேண்டுமானால் நடுங்கும்..பாம்பின் புற்றுத்தேடி,மரமேல்,வேலிமேல் பாம்பைத்தேடி படை எடுத்து,கல்லால் போர்தொடுத்தக் காலம்.இறந்த பாம்பை அறிந்து கொள்ள,காலால் உதைத்த பருவம்.காடை முட்டை என்றெண்ணி ,பாம்பு முட்டையைக் களவாடிய நாட்கள்…

நண்டு பிடிக்க பொந்தில் கைவிட்டு ,பாம்பு பிடித்த ஆறு…பிடித்தப் பாம்பை கையிலேந்தி, விலாங்கு மீனென்ற விவரமறியா வயது..

தலையாட்டும் ஒணான்கள் மீது கொலைவெறி கொண்டலைந்த உள்ளம்..உயிர் ஓணான் பிடித்து சித்ரவதை செய்து,அதன் துயர் ரசித்த ரசனை..

கள்ளிச்செடியில் கல்வெட்டு பொறித்து,காதல் சுவடெழுதிய நினைவு..சப்பாத்திகள்ளியின் பழம் சுவைத்து வாய் சிவந்த அழகு…சிவந்தப் பழங்களை வாயிலடக்கி வார்த்தை வற்றிய பேச்சு..கரடேறி காரை பழம்,ஆனாப் பழம் ,நாவல் பழத் தேடல்..

வீட்டிற்கு தெரியாமல் கோலி ஆடி,கில்லி அடித்து அடிவாங்கிய அனுபவம்..ஒன்றாய் அமர்ந்து கூட்டான் சோறாக்கி சமத்துவம் பகிர்ந்த அறிவு.

நொங்கு வண்டிக்கும்,டயர் வண்டிக்கும் வாக்கப்பட்ட வாழ்க்கை..மாங்காய் திருடவும்,கொய்யா பறிக்கவும் பழக்கப் பட்ட பயணம்…

களிமண் பொம்மை செய்து,குண்டுமணி கண்செருகிய கலைநயம்.மழைக்காலங்களில் மணல் வீடு கட்டுகின்ற மட்டற்ற மகிழ்ச்சி.

பூவரசு இலையில் பீப்பி செய்து,ஆமணக்கு இலையில் புல்லாங்குழல் செய்து ஊதிய ஞானம்..

பொன்வண்டு தேடியலைந்த பொன்னான பொழுது..புசு புசு வெல்வெட்டு பூச்சியை தடவிப்பார்த்த பூரிப்பு.

மாடு சவாரிக்காய் மாடுமேய்க்கும் ஆசை.ஆட்டுக்கெடாவுக்கு காயடிக்க கொண்டுபோய் அதன் கால்களை இறுக்கி பிடித்து இறுகிய மனம்.செருப்பு போடாத கால்கள் சிறை கொண்ட முட்கள்..ஆனாலும் சீற்றம் குறையாத நடை.தேனெடுக்கப் போய் ஈ விரட்ட, தெருத் தெருவாய் ஓடிய தீஞ்சுவை நாட்கள்..மரமேறி நொங்கு குலை வெட்டுவதற்கு பதிலாய் நான் பிடித்திருந்த பனை இலை வெட்டி கீழ்விழுந்து நுரை தள்ளியும் புறமுதுகு காட்டாத புறநானூறு.ஆற்றங்கரையில்,மரவல்லி காட்டில் தெரியாமல் கண்டுகளித்த அகநானூறுகள்..

சேற்றுவயலில் நாற்று தூக்கிப் போட்டு ,பரம்பு பலகையில் ஏறி அமர்ந்து,தழை மிதித்து ,தாத்தாக் கொடுக்கும் காலனாக்காய் காவல் காத்த ஏக்கம்… மறைக்கும் தலைகளுக்காய் மணல் மேடு குவித்து ,மேலேறி அமர்ந்து படம் பார்க்கும்,பார்த்த இடத்தை ஈரமாக்கும் ,டூரிங் டாக்கிஸ் அனுபவம்.

குரங்கு பெடல் சைக்கிள் ஓட்டி குதிரை சவாரி செய்த இன்பம்.நெல்லறுத்து பொனையடிக்க மாடு பிடிக்கப் போட்டி.

தெருவோர அகன்ற வெண்திரையில் இலவச படம் பார்த்த பாக்கியம்.தூர்தர்சன் பார்க்கவே தொலைதூரத்து வீட்டை குழுமிவிட்ட ஆக்கிரமிப்பு.

15 பைசா போஸ்ட் கார்டால் உயிர்வாழ்ந்த உறவுகள்.தொலைபேசியை தொட்டுப் பார்க்கவே ஏக்கம் கொண்ட மனது.புது சட்டைக்காய் தீபாவளி,பொங்கல் எதிர்ப்பார்ப்பு..டிரவுசரை விட்டு பேண்ட்டு சட்டை போட்டதில் பேரானந்தம்.

தபால் பெட்டி டிரவுசர்கள்..பள்ளிக்கு மஞ்சள் பை தூக்கிய மலரும் நினைவு..புத்தகம் நடுவே ராணி காமிக்ஸ் ஒளித்து படித்த ரம்மியம்.படிக்கும் பள்ளியில் ஓடு விழுந்து மண்டை உடையும் மாணவர்கள்..காக்கைக்கும்,எங்களுக்கும் ஒன்றாகிவிட்ட மரத்தடி வகுப்பு…அப்பப்பா..இப்படியே அடுக்கிக் கொண்டே போகலாம்..இன்னும் இருக்கிறது ஏனைய நினைவுகள்.அக்காலம் அழகிய பொற்காலம்…

கணினிப் பெட்டிக்குள் கனவாய் முடங்கிப்போனதே இக்காலம்.

இப்பதிவை தொடர்ந்து தன் சிறுவயது நினைவுகளை,நண்பர் ஆதித்தகரிகாலன் தன் களர்நிலத்தில் பயிர் செய்வார்...

———————————————————————————————————————————————————

நினைவுகளை தொடர்பவர்கள்:

1.படைப்பாளி –கருப்பு,வெள்ளையில் கலர்புல் நினைவுகள்..

2.களர்நிலம் –என் நினைவுகளின் நிர்வாணம்.

3.சகோதரன்-நானும் என் கிராமமும்

4.இதயம் பேத்துகிறது –நெஞ்சில் இட்டக் கோலம் எல்லாம்……

ஓகஸ்ட் 27, 2010 at 10:10 முப 6 பின்னூட்டங்கள்

பொறி வைத்த எலி

பூனைப் பிடிக்காத

எலியிது..

பொறியாகி காத்திருக்கிறது.

அகிலம் முழுக்க

இதன்

ஆக்கிரமிப்பைத் தொடர்கிறது.

இந்த மௌஸ் வைத்தப்

(கணிப்)பொறியில்தான்

மாட்டிக் கொண்டிருக்கிறது உலகம்.

ஜூலை 1, 2010 at 10:37 முப 6 பின்னூட்டங்கள்

என் கலைத்தேடலும் கவின் கலைக்கல்லூரியும் – IV

• இவன் மழலைப் பருவத்தில்

எல்லோரும் கார் பொம்மை தேடுகையில்

எனக்கு எப்போதும் கலர் பொம்மை

அமைப்பு அட்ராக்ஷன் வேணும்..

கோலியும் கில்லியும அனைவர்

கையென்றால்..கரிக்கட்டையும்,

கிறுக்கல்களும் எனது கைங்கர்யம்.

• இப்படியே வார்க்கப்பட்ட

எந்நாட்கள.; அந்நாட்களில்..

ஓவியப்போட்டியில் ஒவ்வோர்

முறையும் பெற்ற பரிசு ருசி,

கலைஞனாகவே எனை ரசிக்க துவங்கியது.

• சிறுமூளை பெருமூளை

ஊன், உடல் உணர்வென பின்னாளில்

பிண்ணிப்போனது ஓவியம்.

படிப்பில் மிடில்கிளாஸ் ஆவ்ரேஜ்

மார்க்கில் அவுட் ஆகாமல்

தப்பிப்பவன்.

ஆனால் ஓவியத்தில்.O GRADE

இப்படியான பள்ளி பருவங்கள்..

ஓடி ஓடி ஓவியம் தேடி

நாடி நாடி நயம்பட தீட்டி கூட்டி

கூட்டி சேகரித்து அகம் மகிழ்ந்து

நகர்ந்த அந்நாட்கள்.

• படம் வரைந்து பாகம்

குறிக்க சொன்ன பாடங்களெல்லாம்

மற்ற மாணவர்க்கு வெறுப்பு..

எனக்கோ விருப்பு..

• இப்படியான எனது நாட்களெல்லாம்

பிள்ளையாரையும், பெருமாளையும்

தேடி, தேடி வரையும்.

• விஷ்னுக்குத்தான் தசவதாரமா?

பிள்ளையாருக்கு?

நூறவதாரம் என்னால்…

ரஜினி ஸ்டைல்… பேண்டு சட்டை

அம்மணமாய்,

அழகாய், கருப்பாய், வெளுப்பாய்

காந்திய ரீதியில் கோவணமாய்..

பாஞ்சாலியை துகிலுறித்த துரியோதனனைப்போல்

மயிலுக்கு போர்வையளித்த பேகனைப்போல.;

வள்ளலாய்..வில்லனாய்..

பிள்ளையார் என்னால் பிரச்சினைக்

குள்ளானார்.

பின்னாளில் தெரிந்தது

பிள்ளையார் என்னால் மடடுமல்ல.

எல்லோராலும் கருச்சிதைந்திருக்கிறார்..

இல்லை உரு.

மாற்றி வரைவதற்கு ஏற்ற உருவமாய் அவதரிப்பதும்

அதற்கு

காரணம்.

கார்ட்டூன் கேரக்டரைப்போல்… அவரிருப்பதும்

அதற்கு துணை.

• அப்போதெல்லாம்

தின இதழ்களிலும், வார இதழிழும்

சிறுகதைகளுக்கு வரும் ஓவியங்களே

எனக்கு வரப்பிரசாதம்.

இலவச இதழ்கள் (சிறுவர்மலர், தினமலர்)

இவனுக்கு தீனி.

• மைக்கேல் ஆஞ்சலோவும்,

லியானர்டோவும் இவன் அறிவு அறியா

காலம்..

இவன் மதிக்கு தெரிந்தது மாருதியும்,

மா.செ வும் மட்டுமே.

இதுதான் ஓவியம் என

எனக்கு நானே வட்டமிட்டு வலம்

வந்த வயது.

• நன்றாக நினைவிருக்கிறது

பத்தாம் வகுப்பு முடிக்கிறேன்.

என்ன படிக்கலாம்.. எங்கு படிக்கலாம..;

தினமணியின் மணியான வெளியீடு.

வருங்கால வாழ்க்கை வரவேற்பிற்காய் புத்தகம்

புரட்டுகையில்..

கும்பகோணம் கலைத்தொழில் கல்லூரி

கண்ணில் படுகிறது.

10ஆம் வகுப்பு தேர்ச்சி போதும் 5 ஆண்டுகள்..

காதலில்தான் மனதில் பட்டாம்பூச்சி

படபடக்கும் என்பார்கள்…

அது பொய்..

எனக்கு படபடத்ததே அப்போ!

தினசரி பழக்கம் குறைவெனினும்

கல்லூரி விளம்பரம் தேடி தினசரி பழக்கமாய் தினசரி

படிப்பு.

அப்புறம் ஆய்ந்ததில்..

விளம்பரம் வந்து வெகுநாட்கள்

ஆகி.. வேறொருவர் மூலம் விபரம் வர..

கடைசி நாளாய்.. கல்லூரி சென்று

விண்ணப்பம் நிரப்பிய நாட்கள்

ஆஹா… நானறிந்த எம் ஊரில்

நான்தான் அப்போ நன்கறிந்த

ஓவியன்.. நமக்கா சீட் கிடைக்காது

என்கிற மிதப்பு.

நுழைவுத்தேர்வெழுதி நொண்டி,

நொண்டி ஓடிய நாட்கள்.

ரிசல்ட் இன்று நாளையென்று எண்ணி எண்ணி ஓட்டி..

ஓட்டி..

ஓய்ந்த காலம்.

சீட் கிடைக்கவில்லை என்பதை

சிந்தைக்கு சொல்லிற்று.

அப்போதான் ஓவியனாய்

நான் கொண்ட அகந்தை அடங்கிற்று.

ஓ.. நாம் கற்றுக்கொள்ள வேண்டியது

இன்னும் இருக்கு.

தேடு வலைவீசு.. இது எனது மனம்.

சரி கல்லூரி கிடைக்குமென

நம்பி.. தேய்ந்து ஓய்ந்த

கடைசித்தருணத்தில்..

இந்த ஆண்டு கேள்விக்குறியா?

என்பதுபோல் 11 ஆம் வகுப்பு.

• தேடிப்பிடித்து ஆசான் ஒருவர் தயவில்

தலைவாசல் பள்ளியில்

தொழிற்கல்வி பிரிவில் எனக்கு இடம்.

அப்போ அறிந்தது பிளஸ் டூ படி

பின்பு சிங்கார சென்னையில்

ஓர் சீர்மிகு கல்லூரியாம்..

கலைத்தொழில் கல்லூரி

உண்டென்று கவனப்பட்டவன் சொல்லிட

ஆர்வம் அதிகமானேன்.

ஈராண்டு எப்போ ஓடுமென்று

ஓட்டி, ஓட்டிய பள்ளிநாட்கள்

நான் படித்தது POULTRY SCIENCE

என்பதால்

கோழி வரைவதே குணமானது.

ஓவியமே எனக்கு என்றானது.

வாவ் +2 முடிந்தது..

(வானவில் வளரும்…)

நன்றி: யூத்புல் விகடன் குட் ப்ளாக்சில் தேர்வு செய்தமைக்கு.

ஜனவரி 21, 2010 at 11:24 பிப 1 மறுமொழி

நவீனத்துவ யுத்தம்(Digital War).

என் கணினி தூரிகை சிதறல்(2003). .

திசெம்பர் 30, 2009 at 9:11 பிப 5 பின்னூட்டங்கள்

Older Posts




இத்தளத்தின் இடுகைகளை பெற உங்கள் மின்னஞ்சல் முகவரியினை பதிவிடவும்

Join 155 other followers

ஆக்கங்கள்

அண்மைய பதிவுகள்

விளம்பரம்

அனைத்து தகவல்களும் முறையாக Creative Common 2.5 - ஆல் காப்பிரைட் செய்யப்பட்டு வெளிவருகிறது.
Creative Commons License
my page by ennangalum,vannagalum is licensed under a Creative Commons Attribution-Noncommercial-No Derivative Works 2.5 India License.
Based on a work at padaipali.wordpress.com.
Permissions beyond the scope of this license may be available at https://padaipali.wordpress.com/.

Share this blog

Bookmark and Share

விருந்தினர்கள்

Thiratti.com Tamil Blog Aggregator

Blog Stats

  • 200,117 hits

%d bloggers like this: